عشقت متمردة
انتي بس كل اللي مضايجك انك مسافرتيش وشايفة ان
زين منعك من حلمك اللي مستنياه من سنين مش كده
بصتله وانا مش مصدقة انه عارف كل دا هو ازاي عرف اصلا انا مقلتش لحد عن احساسي ابدا ولا اتكلمت فيه ويمكن دي فعلا اكتر حاجة مضايقاني من الجوازة دي
ياجدو انا مكنتش مسافرة عشان العب انا كنت مسافرة اكمل ابحاثي ودراستي انا كنت هساعد ناس كتير اوي انا كنت شغاله علي دوا مهم وبجد برا كانت فرصتي انه يطلع للنور بس كل احلامي اتهدت في لحظة ومن غير ارادتي كمان
ياجدو مش القصد مهما كمان هيستفادو بس برا فرصتي احسن برا بيقدرو الحاجات دي كويس اوي انا لو قعدت هنا عمري كله ممكن محدش يسمع عني اصلا
ودي مشكلتك يابنت علي
بصتله وانا مش فاهمه فكمل
المظاهر بتجري ورا المظاهر حديتك عن ان حد يسمع عنك وتتشهري مش عن هتبقي سبب ف علاج كام واحد حتي لو مش خابر مين كان السبب في علاجه
بص ياجدو خلي الموضوع دا بعدين خلينا في الاهم دلوقتي يعني انت يرضيك اني اتجوز واحد مش حباه ومش موافقه عليه
وهو انتي مش موافجة علي زين ياغنوة
انتي بس زي مجلتلك شيفاه عجبه في تحجيج حلمك مع انه يجدر يساعدك لكن الحجيجة انتي معجبه بيه ولو زين كان اتقدملك في ظروف تانيه انا متاكد انك كنتي وافجتي عليه
لا ياجدو انا عمري مكنت هقبل بالوضع دا ليه اعيش في مكان مش عوزاه وسط ناس مش عوزاني واديك شايف مرات عمي واضح اوي انها مش عوزاني وليه اتجوز واحد جاهل اصلا
سوري ياجدو مش قصدي بس مش دي الحقيقة انت مش شايف منظره عامل ازاي طول الوقت بجلبيه وعصاية انا اتجوز واحد بجلبيه
بصلي جدو كتير بصه مفهمتهاش بس يمكن بصته حسستني اني متوترة واني غلطت او يمكن حططتني قدام حقيقة اني كل اللي فارق معايا فعلا شويه مظاهر !!
بعدها ابتسم جدو ابتسامه مفهمتهاش
بصي ياغنوة مش هناجشك في الحكاية دي لان دا يخص زين ومسيرك تعرفيه زين وساعتها هتتشكريني انا وابوكي بس دلوجت ياغنوة عشان مصلحتك متجوليش لحد انك مش موافجة علي الجوازة دي الكل فاهم انك راضية وعتحبيه كمان
بصي يبنتي كل حاجة هتفهميها في وجتها دلوج هتسمعي كلامي وتنفذيه هتجهزي نفسك ومروة هتنزل معاكي تجيبي كل اللي نفسك فيه الجوازة دي لازم تتم في اجرب وجت ودا لمصلحتنا كلنا وصدجيني مش هتندمي ثجي فيا انا وابوكي يابنتي
بصي هتفج معاكي اتفاج ادي نفسك فرصة ست شهور مع زين ولو مرتاحتيش معاه انا هخليه يطلجك بنفسه جلتي اي
بصتله وانا حاسة ان دا طوق النجاه اللي ظهرلي في وسط كل دا حضنت جدو بسرعة وعرفته اني موافقة مع اني كنت شايفة في عينه ثقة اني هكمل بس وافقت وانا عارفه اني مش هستحمل ولا تلات شهور حتي
خرجت من المكتب وانا مش عارفة اللي عملته دا صح ولا غلط بس شايفة ان دا الحل الوحيد دلوقتي بصيت حواليا ملاقتش حد غير مروة ومرات عمي ومعاهم بنت معرفهاش ابتسمت ومشيت بهدوء عشان اطلع اوضتي
مشيفناش اياك يابنت ليلي
استغفرت جوايا الف مرة وانا ببص تاني ليها وبحاول امسك اعصابي
لا شيفاكي دا انتي تملي العين ياطنط بس قلت اسيبكو براحتكو
حسيت كلامي ضايقها بس مهتمتش
طب تعالي أما اعرفك علي مريم بنت اختي
استغربت اي الحنيه اللي فجاه دي قربت بهدوء ومديت ايدي ليها
أهلا وسهلا
مدت ايدها بعجرفة وسلمت عليا وحسيتها مش طيقاني زي خالتها
